*** အချိန်တန် နွားပိန်ကန် အလိမ်ခံရပေါ့ ***
ဘဝရဲ့ တစ်ဝက်လောက်မှာ
အလိမ်ခံရမှန်း သိတော့
ရှေ့ဆက် အသက်ကြီးဖို့သာ ကျန်တော့တယ်။
ဆတ်ကနဲ ထခုန်ပြီး
အကြောက်အကန် ငြင်းဆန်မိတာတွေလည်း
ရှက်မိ
ဗာဒံရွက်တွေကို ရယ်မိတာကိုလည်း
ရှက်မိ
(ဘာကြောင့် ရယ်မိမှန်းတောင် တွေးမရဘူး)
မလိုအပ်ပဲ ရွက်ကုန်ဖွင့်မိတာတွေလည်း
ရှက်မိ
ကိုယ်မှမကယ် သေဖွယ်ရာရှိတယ်
ကမ္ဘာကြီးအပေါ် အမြင်စောင်းမိတာတွေလည်း
တွေး
ရှက်မိပါတယ်။
လမ်းခုလတ်ကြီး အလိမ်ခံလိုက်ရတယ်
မေးခွန်းမထုတ်ဘဲ ဆက်သွားမလား
သေမလား အခြေအနေနဲ့
အလိမ်ခံလိုက်ရတယ်
ဓါးအိမ်ထဲက ဓါးကို ဆွဲချွတ်ပြီးကာမှ
အလိမ်ခံလိုက်ရတယ်
ပုဂ္ဂလိက အလိမ်/အများ လိမ်
လိင်မကွဲတော့အောင်အထိ
အလိမ်ခံလိုက်ရပါပေါ့။
"ကျနော်မှာ့ ဘာမှမရှိတော့ဘူး
ဘာမှ မရှိတော့ဘူးဗျ"
အလိမ်ခံလိုက်ရပါပေါ့လား။
သစ်ရွက်တွေက လေမှာ
လူးတုန်း
ငြိမ်းချမ်းရေးကာလကြီး ဆိုတာတောင်မှ
ကလေးတွေက လမ်းပေါ်မှာ သေတုန်း
ပျားတွေက အုံအသစ်တွေ ဖွဲ့တည်တုန်း
လမ်းတွေကလည်း ဖြာတုန်း
နိုင်ငံရေးဟာလည်း
တစ်ချပ်မှောက်ဆန်တုန်း
့သဘာဝပတ်ဝန်းကျင် ပျက်စီးတုန်း
အလိမ်ခံလိုက်ရပါတယ်ဗျာ .....
သြဝါဒလေးမှ မခြွေရ
သဲလွန်စလေးမှ ချန်ခဲ့ချိန်မရ
အချိန်မှန် နေရာမှန်
နွားပိန်ကန်
အလိမ်ခံလိုက်ရတာပေါ့။ ။
လင်းခါး
၁-၇-၂၀၁၃
No comments:
Post a Comment