ဟစ်တလာ့ ခေါင်းထဲဝင်သွားတဲ့ ကျည်ဆံတော့
ဘယ်သူမှ အပြစ်မြင်မှာမဟုတ်။
ကျည်ဆံဟာ ကျည်ဆံအလုပ်
ဖောက်ဝင်မယ် ထိုးခွဲမယ် ဇီဝိန်ကို ခြွေမယ်
သေမယ့်လူဟာ
ကင်း ဂျူနီယာလား
အာနက်စတို ချေဂွေဗားရားလား
ကဒါဖီလား
ဂန္ဒီလား ခွဲနေမှာတော့ မဟုတ်။
ကျည်ဆံတွေ
ဒါက ဗိုလ်ချုပ်အောင်ဆန်းရဲ့ ကိုယ်ထဲက
ဒီတစ်တောင့်က သခင်မြ ကိုယ်ထဲက
ဒီတစ်တောင့်ကတော့ဖြင့်
မာယာကော့စကီးရဲ့ ခေါင်းထဲကပါ။
ကျည်ဆံတွေ
ရာဘာကျည်ဆံတွေ
ခဲကျည်ဆံတွေ
ကလေးကစားစရာ ကျည်ဆံတွေလည်း ရှိပါတယ်
ကလေးကစားစရာတွေ
ကလေးအိပ်မက်တွေ
ကလေးစာသင်ကျောင်းတွေကို ဖျက်ဆီးခဲ့တဲ့
အမြောက်ကျည်ဆံတွေလည်း ရှိပါတယ်။
ကျည်ဆံဆိုတာက
ခေါင်းထဲဝင် ဦးနှောက်ကိုဖောက်သွားရင်ဖြင့်
ဂျူးလူမျိုးလည်း သေမှာ
ဗမာလည်း သေမှာ
ဂျာမန် အင်္ဂလိပ် စသဖြင့်
လူမျိုးမရွေး ဘာသာမရွေး
အသားအရောင်မရွေး လိင်မခွဲခြား
တိရစ္ဆာန်ကအစ တစ်ဘဝဖြစ်ပျက်တော့
ချုပ်သွားမှာ။
ကျည်ဆံတွေ
အမှန်တရား ဘက်တော်သားတွေလည်း
တော်လှန်ရေးအတွက် ကျည်ဆံလိုသတဲ့
အာဏာရှင်များကလည်း နှိမ်နှင်းဖြိုခွင်းထိုးစစ်ဆင်ဖ
ကျည်ဆံလိုသတဲ့
အာဏာရှင်ကတော့ ကျည်ဆံကိုမဖြုန်း
သူက မိုးပေါ်ထောင်ပစ်တာ မပါဘူး တဲ့။
ကျည်ဆံတွေ ကျည်ဆံတွေ
ကျည်ဆံတွေ ဘယ်ကလာသလဲဆိုရင်
သေနတ်ပြောင်းဝက ထွက်လာပါတယ်။
ဒီလိုဆိုတော့ ကျည်ဆံတွေဟာ
အာဏာတွေ ဖြစ်နေပြန်ပါရော
ဒီလိုတော့ မဟုတ်လောက်ပါ
ကျည်ဆံဆိုတာ
အမုန်းတရားက လာပါတယ်
ကျည်ဆံဆိုတာ
ရူးသွပ်မှုကနေ လာပါတယ်
ကျည်ဆံဆိုတာ
နှလုံးသားကနေ လာပါတယ်
ကျည်ဆံဆိုတာ
လူသားကနေ လာပါတယ်
ကျည်ဆံဆိုတာရှိနေလို့
ကျည်ဆန်တွေ သွားနေ လာနေရပါတယ်။ ။
လင်းခါး
၁၇-၇-၂၀၁၃
No comments:
Post a Comment