*** ထူးဆန်းသော ကျောက်တုံးကြီး ***
ပင်လယ်ကို ငေးရင်း ထိုင်နေတုန်း
ကျောက်တုံးကြီးဟာ ဘွားခနဲ ပေါ်လာတာပါပဲ
ဘယ်လို ဖြစ်နိုင်မလဲ
ရေထဲကနေ လင်းပိုင်တွေ ထခုန်သလို
ကျောက်တုံးကြီးပေါ်လာတော့
ထင်းတုံးကြီးလို့ ထင်ကြတာ
လှိုင်းပုတ်တော့ ကမ်းစပ်ကိုရောက်လာ
ဒီမှာ ထူးဆန်းသော ကျောက်တုံးကြီးပါ
ကျောက်တုံးကြီးမှာ
အဆင်အသွေးအကွက်မပါ
ပြောင်ချော
ကျောက်တုံးကြီးက ကြောက်စရာ
လူတွေ မျက်လှည့်ဆရာ မျက်လှည့်ပြတယ်ထင်နေတယ်
ထူးဆန်းသော ကျောက်တုံးကြီးဟာ
ဘာစကားမှလည်း မပြောဘူး
သူ့ဟာသူ နေတာပဲ ကမ်းစပ်မှာ
နေပါဦး ဒီကျောက်တုံးကြီးကို ခင်ဗျားက စမြင်တာလား
မဟုတ်ပါဘူး
ဒါပေမယ့် သေချာပါတယ်
မနေ့က ဒီနေရာမှာ ဒီကျောက်တုံးကြီးမှ မရှိဘဲ
မဟုတ်ဘူးလေ ဒါကို ခင်ဗျား ပင်လယ်ငေးရင်း
မျောလာတာလို့ ပြောတယ်လေ
ဟုတ်ပါတယ် မျောမလာလို့ ဘယ်လိုလာမှာလဲ
ဟာဗျာ ကျောက်တုံးက ဘယ်လို မျောလာမလဲဗျ
ကျောက်တုံးထက်လေးတဲ့ သင်္ဘောကြီးတွေတောင်
မျောသေးတာပဲ
ဟာ .....
ဒါကြောင့် ကျောက်တုံးကြီးလို့ မပြောဘဲ
ထူးဆန်းသောလို့ နာမဝိသေသန တပ်ထားတာလေ
မျောလာတယ်လေ မြန်မြန်ကြီးမျောလာတာ
ဒါက တြိယာဝိသေသန
အနှစ်တရာမှာ တစ်ခါလောက်သာ ဖြစ်တတ်တဲ့
ထူးဆန်းသော ကျောက်တုံးကြီးမျိုးပဲ
ဟိမဝန္တာဆင်တွေလိုပဲ
ဟိမဝန္တာ ကျားတွေလိုပဲ
ရှားတယ်
မဟုတ်ဘူး ကျောက်တုံးကြီးမှ မဟုတ်ဘူး
ကျောက်တုံးလေးလည်း ရေထဲမပေါ်ဘူး
ကျောက်တွေ ရေပေါ် မပေါ်ဘူး
ကျောက်ခဲ ရေပေါ် ဆိုတာရောဗျာ
ဘူးတောင်း နစ်လို့ စောင်းခြမ်းပေါ်
ဆိုတာကောဗျာ
ဟာ...
ဒါဟာ သေချာတယ်
ဒီမှာ ထူးဆန်းသော ကျောက်တုံးကြီး
ကမ်းစပ်မှာ
လူတွေက အစွဲတွေနဲ့ ကျောက်တုံးဆိုတာနဲ့
ရေအောက်ပဲ ထားချင်တယ်
ဒါကို ဒီ ထူးဆန်းသော ကျောက်တုံးကြီးက
တော်လှန်လိုက်တာပဲ
တော်လှန်ပစ်လိုက်တာပဲ
ဟေ့ ဒီမှာ ဒီမှာ
ထူးဆန်းသော ကျောက်တုံးကြီးပါခင်ဗျာ။ ။
လင်းခါး
No comments:
Post a Comment