တကယ်မရှိတဲ့ မြို့ကြီးရဲ့ ပလက်ဖောင်းတွေပေါ်
လျှောက်ကြည့်ခဲ့ပြီးပြီ
တကယ်မရှိတဲ့ မြို့ကြီးရဲ့ အာဟာရတွေလည်း
မြည်းစမ်းဖူးပြီ
တစ်ချိန်က တကယ်မရှိတဲ့နိုင်ငံကို
တကယ်ရောက်လိမ့်မယ်ထင်တာ
အခုတော့ အဲဒီအတွေး တကယ်ရှိခဲ့လားတောင်
သံသယဖြစ်စရာပဲ။
ကျွန်တော်တို့ရဲ့ နေ့စဉ်ဘ၀က တကယ်မရှိတာတွေရဲ့
အဆွဲဆောင်ခံ၊ အငြို့ယူခံ၊ အသိမ်းသွင်းခံ
တကယ်မရှိတဲ့ ဘ၀တစ်ခုကို
တကယ်မျှော်မှန်းခဲ့တာတွေ၊
တကယ် မရှိတဲ့ ငြိမ်းချမ်းရေးကို
တကယ်မျှော်လင့်ခဲ့တာတွေ၊
တကယ်မရှိတဲ့ အိပ်မက်ထဲမှာ၊ ကိုယ်တကယ်ရှိခဲ့သလို
ငယ်ငယ်က တကယ်မရှိတဲ့အရာတွေကို ကြောက်ရွံ့ရတယ်၊ စွဲလန်းရတယ်
ကြီးလာတော့ တကယ်မရှိတဲ့အရာတွေကို မိုက်မဲစွာ တောင့်တလာတယ်
တကယ်မရှိပါဘူးပြောနေတဲ့ အသံနောက်
ဘာတွေရှိမှာလဲ တွေး၊
တကယ်ပဲ တကယ်မရှိတာတွေနဲ့ တကယ် အချိန်ကုန်ခဲ့တာတွေ
ဒါပေမယ့်
ဒါတွေကို တွေး၊ သိပ်ယူကျုံးမရ ဖြစ်နေဖို့တော့လည်း မလို
တစ်ချိန်က ကိုယ်တကယ် ရှိခဲ့တယ်ဆိုတာတောင်
နောက်လူတွေက သံသယရှိဦးမယ် မဟုတ်လား။ ။
လင်းခါး
၃၀-၄-၂၀၁၃
No comments:
Post a Comment