***** စိတ်ကူးယဉ်နေတဲ့ မြို့ ကြီး *****
စိတ်ကူးယဉ်နေတဲ့ မြို့ကြီးထဲက
စိတ်ကူးယဉ်နေတဲ့ လမ်းသွယ်တွေ
အတင်းတုပ်နေတဲ့ အဘွားကြီးတွေ
လက်သီးလက်မောင်းတန်း လူငယ်တွေ
ငှက်ကလေးတွေဟာ သစ်ကိုင်းတွေပေါ်ကနေ
သစ်ရွက်ပေါ် သစ်ရွက်ပေါ်ကနေ မြေကြီး
မြေကြီးပေါ်ကနေ တစ်ခါ သစ်ပင်ပေါ်
ကလေးတွေက နောက်ဖေးလမ်းကြားမှာ ပြေးလွှား
အော်ဟစ်
အိမ်ရှင်မတွေအိတ်ထဲမှာ ငွေကနည်းနေပြီ
သူတို့ မီးခိုးတွေကြားကနေ နောက်ဖေးက ကလေးတွေကို
လှမ်းဟန့်တယ်။
လက်ဖက်ရည်ဆိုင်ဘေးက ဗာဒံပင်အောက်မှာ
ပင်စင်စားများ ကျားပွဲ
ဆိုက်ကားဆရာတွေက ကျီးမော့/မော
လက်ဖက်ရည်ဆိုင် ကောင်တာနောက်မှာ
မေးစေ့က အမွေးကျဲကို နှုတ်ခမ်းစူလျက်
စွဲနှုတ်နေတဲ့ ငိုက်မျဉ်းလူတစ်ယောက်
အလင်းပြန်နေတဲ့ နေ့လည်ခင်း
လမ်းဘေး အပေါ့စွန့်တာနဲ့ ပြည့်နေ ပိတ်နေတဲ့ မြောင်းတွေ
ပလက်ဖောင်းထောင့်မှာ ကျွတ်ကျွတ်အိတ်
ကော်ဖီမစ်ထုပ်အခွံ နေကြာစေ့ အခွံ ချဉ်ပေါင်းဖတ်ဟောင်းတွေ
ပလက်ဖောင်းဘေး ကပ်ရပ် ပြတင်းပေါက်ဘောင်မှာ
မေးတင်နေတဲ့ အပျိုကလေးနှစ်ယောက်
ပြီးခဲ့တဲ့ ညနေက ကြည့်ခဲ့တဲ့ ရုပ်ရှင်နဲ့
ခုလေးတင်ပြီးသွားတဲ့
ကိုရီးယားဇာတ်လမ်းတွဲ အပိုင်း(၁၄၇)အကြောင်း
ည ဂစ်တာလာတီး/ဆိုဦးမယ် ပန့်ကေ ဘောင်းဘီဖင်ကျပ်နဲ့
ကောင်လေးအကြောင်း
အီမိုစတိုင် နဲ့ ဖွေးသန့်ချော ချာတိတ်အကြောင်းလည်းပါ
အပေါ်ထပ်မှာ သူတို့ အစ်ကိုကြီး
ပါရီကျဆုံးခန်း ဖတ်နေတယ်။
သူ အပြင်ကို ကြည့်လိုက်တော့
အမှိုက်ပုံထဲမှာ တိုးဝှေ့နေတဲ့ မြီးကုပ်ခွေးတစ်ကောင်နဲ့
ညစ်ထေးနွမ်းဖတ် စုပ်ချွန်း ကလေးတစ်ယောက်
ပါရီကျဆုံးခန်းကိုပိတ် သက်ပြင်းချတယ်။
အိမ်စေမိန်းမကြီး ဖြတ်သွားတယ်
လမ်းပူပေါ်
သက်ပြင်းချတယ်။
ဂျာနယ်တွေ ဆိုင်ကယ်နဲ့ လိုက်ပို့သူကို
ခွေးက ဟောင်တယ်။
လူနာတင်ကားဟာ ငှက်ဆိုးသံကို ဟွန်းတပ်ထားပြီး
မြို့ကို သတိပေးသလိုလို
အိတ်ဇော မပါဘဲ ဂီယာဖရီးချ
လီဗာခပ်ပြင်းပြင်းပုတ်သွားတဲ့ ဆိုင်ကယ်တစ်စီး
ရထားလာတယ် သံလမ်းကိုပိတ်တယ်
ဆိုင်ကယ်သမားက ပိုပြီး ချိုကြွ
ပိုပြီး လီဗာကိုဖြဲ
မော်တော်ပီကယ် လန့်နိုးတော့ ငြိမ်သွားတယ်။
ရဲကားပြာကြီး ဖြတ်သွားတယ်
အပေါက်တွေကြားက သံတိုင်ကိုင်လက်တွေ
အရူးတစ်ယောက် လမ်းဆုံမှာရပ်
တစ်ကိုယ်လုံး ချွတ်ချလိုက်တယ်
ဟယ် ..... ကောင်မလေးတွေ သွေးပျက်သွားတယ်
အရူးက အော်တယ်
"မင်းတို့ ရူးနေကြပြီကွ " တဲ့။
လူတွေဟာ အရူးကို လှမ်းကြည့်တော့
ရူးနေမှန်းသိတော့ စိတ်မဝင်စားဘူး
ပြတင်းဘောင်က ချာတိတ်မလေးတွေက
ပိတ်ထားတဲ့ လက်ချောင်းတွေကြားက
ပြန်ငေးတယ်
စိတ်ကူးယဉ်နေတဲ့ မြို့ကြီး
ဘယ်သူကမှ တားဆီးမထားဘူး။ ။
လင်းခါး
၂၅-၆-၂၀၁၃
No comments:
Post a Comment